Alle mine kjære

Familie i oppløysing
Sjølv om Susie forlet jorda, blir ho att i minnet til familien og vennene. Ho forsvinn heller ikkje for lesaren. Susie kjem til himmelen, og frå himmelen ser ho ned på jorda og på alle sine kjære. Det er ho som fortel oss historia. Ho ser familien som går i oppløysing etter tragedien: Mora som går frå faren, og faren som leitar desperat etter mordaren. Ho ser den håplause etterforskinga og mordaren som snik seg unna. Men samstundes ser ho systera og broren bli vaksne. Ho ser korleis dei skaper seg eit nytt liv i skuggen frå døden hennar.

Ein draumehimmel
Det uvanlege forteljargrepet blir tatt godt vare på i Alice Sebolds likeframme, vakre språk. Ved å bringe oss nær inn på den avdøyde Susie, og på familie og venner på jorda, skaper ho sympati og innleving. Ho fortel om det grufulle med ein intelligent stemme - og enda til med humor! Susies himmel er til dømes ein plass der ho får alt det ho ønskjer seg av is og hundekvalpar, og der lesebøkene på skulen er Vogue og Seventeen. Samstundes er det ein trist plass, for det ho ynskjer mest av alt - familie og venner - er på jorda.

Forteljinga om Susie har trollbunde millionar av lesarar i USA og England. Det skuldast kan hende at Alle mine kjære er ei utforsking av tap og sorg, men med ei tru på dei levande som byggjer håp ut frå sorga.

Alice Sebold
Alle mine kjære
Originaltittel: The Lovely Bones
Oversatt av Anne Karin Torheim
Forlag: Det norske Samlaget