Gjendiktingar

Breitt utval tekstar frå sentral gjendiktar.

Johannes Gjerdåker (1936-2020) er ein av dei viktigaste gjendiktarane våre. Han har gjort strålande arbeid med diktarar frå klassisk litteratur til vår eiga tid, og har fått fleire prisar.

«Gjendiktingar» inneheld høgdepunkta frå gjendiktingsarbeidet til Gjerdåker. Ved sida av hans eigne bøker er det teke med dikt og songar frå antologiar, aviser, tidsskrift og plater. Nokre tekstar til sentrale klassiske musikkverk er òg inkluderte. Robert Burns var ein sentral diktar for Gjerdåker. Elles femnde han svært vidt: Gjendiktingane hans strekkjer seg frå klassikarar på latin via islandsk visetradisjon, engelske og tyske romantiske diktarar og modernistiske dikt til kjende popsongar. Her er òg nokre av hans eigne dikt med, 23 meisterlege sonettar frå debutboka Skot på gamal stuv (1978). Det høver å minna om at ein god gjendiktar òg må vera ein god diktar.

«Gjendiktingar» er redigert av Per Olav Kaldestad. Håvard Rem har skrive etterord.