Den 7. februar 2022 fylte Magnus Rindal 80 år. Han er stadig ein aktiv forskar, og kan sjå tilbake på eit langt og innhaldsrikt liv i akademia. Vi som her har tatt initiativ til å gje ut eit festskrift på åremålsdagen, har alle mykje å takke Magnus for, og vi håper og trur at dette skriftet både er til glede for jubilanten og til gagn for fagfellesskapen vi deler med han.

Festskriftet inneheld eit utval av tekstar jubilanten sjølv har skrive gjennom yrkeslivet. Tekstane er valde ut for å gje eit bilete av hovudspora Magnus har arbeidd etter, og for å samle tekstar som er og burde vere etterspurde for noverande og framtidige fagfolk. Magnus har sjølv kome med innspel til utvalet, og han har også levert eit nyskrive bidrag til denne utgjevinga.